ਗੀਤ
...
ਹਿਜਰ ਦੀਆਂ ਸਿਲਤਾਂ ਨੇ
ਵਿੰਨ ਵਿੰਨ ਦਿੱਤਾ ਰੋਮ ਰੋਮ
ਕੱਢਾਂ ਦੱਸ ਕਿਹੜੀ ਸੂਈ ਨਾਲ
ਨੀ ਅੰਮੀਏਂ ਵੈਦ ਮੇਰੀ ਪੀੜ ਦਾ ਨੀ ਭਾਲ ।
ਆਸਾਂ ਦੇ ਬਾਗ਼ ਵਿੱਚ , ਰੀਝਾਂ ਦੇ ਫੁੱਲ ਮਾਏ
ਬਿਰ੍ਹੋਂ ਦੇ ਝੱਖੜ ’ਚ ਆਏ ਨੀ
ਦਿਲ ਦੀਆਂ ਸੱਧਰਾਂ ਦਾ, ਝੜ ਗਿਆ ਬੂਰ ਮਾਏ
ਪਲ-ਪਲ ਚਾਅ ਕੁਮਲਾਏ ਨੀ
ਟੁੱਟ ਟੁੱਟ ਡਿੱਗੀਆਂ, ਪੱਤੀਆਂ ਉਮੀਦ ਦੀਆਂ
ਖਾਲੀ ਹੋਈ ਸੁਫਨਿਆਂ ਦੀ ਡਾਲ਼ ।
ਨੀ ਅੰਮੀਏਂ...
ਮਿੱਟੀ ਦਾ ਬਣਾ ਕੇ ਇੱਕ, ਬਾਵਾ ਮਾਏ ਮੇਰੀਏ
ਸੋਨੇ ਰੰਗੇ ਖੰਭ ਮੈਂ ਲਾਵਾਂ ਨੀ
ਚੁੱਪ- ਚਾਪ ਤੱਕਦਾ, ਬੇਜਾਨ ਬੁੱਤ ਮਾਏ
ਸ਼ਿਕਵੇ ਮੈਂ ਦਿਲ ਦੇ ਸੁਨਾਵਾਂ ਨੀ
ਕੇਹਾ ਇਹ ਸ਼ੌਂਕ ਭੈੜਾ,ਦਿਲ ਨੂੰ ਵਰਾਵਣੇ ਦਾ
ਕੈਸ਼ਾ ਇਹ ਚੰਦਰਾ ਖਿਆਲ ?
ਨੀ ਅੰਮੀਏਂ...
ਡਾਹ ਕੇ ਪੀੜਾਂ ਸੋਚ ਦਾ,ਅਟੇਰਦੀ ਖਿਆਲ ਮਾਏ
ਯਾਦਾਂ ਦੀ ਕੱਤਦੀ ਹਾਂ ਤਾਣੀ ਨੀ
ਮਹੁੱਬਤ ਦੀ ਪਿਆਸ ਮਾਏ ,ਮਚਾਉਂਦੀ ਐ ਕਾਲਜੇ ਨੂੰ
ਅੱਗ ਲੱਗੜਾ ਬੁਝਾਵੇ ਨਾ ਪਾਣੀ ਨੀ
ਜਵਾਲਾਮੁਖੀ ਫੁੱਟਦਾ ,ਜਿਸਮ ਚੋਂ ਮਾਏ
ਆ ਜਾਣਾ ਲਗਦਾ ਭੂਚਾਲ ।
ਨੀ ਅੰਮੀਏਂ...
ਕਿੱਥੇ ਖੌਰੇ ਉਲਝਿਆ ,"ਸਿੱਧਰਾ ਚੌਹਾਨ" ਮਾਏ
ਲਵੇ ਨਾ ਅੱਜ ਕੱਲ ਸਾਰ ਨੀ
ਇਸ਼ਕ ਦੇ ਤੂਫਾਨ ਵਿੱਚ,ਫਸੀ ਇਸ ਜਿੰਦੜੀ ਨੂੰ
ਬਾਹੋਂ ਫੜ ਕੱਢਦਾ ਨਾ ਬਾਹਰ ਨੀ
ਰੂਹ ਵਿੱਚ ਰਚ ਗਿਆ, ਕਮਲਾ ਜਿਹਾ ਨੀ
ਮੁਹੱਬਤ ਦਾ ਬਣ ਕੇ ਗੁਲਾਲ ।
ਹਿਜਰ ਦੀਆਂ ਸਿਲਤਾਂ ਨੇ
ਵਿੰਨ ਵਿੰਨ ਦਿੱਤਾ ਰੋਮ ਰੋਮ
ਕੱਢਾਂ ਦੱਸ ਕਿਹੜੀ ਸੂਈ ਨਾਲ
ਨੀ ਅੰਮੀਏਂ ਵੈਦ ਮੇਰੀ ਪੀੜ ਦਾ ਨੀ ਭਾਲ ।
" ਚੌਹਾਨ"
'
No comments:
Post a Comment